الكازي في الرازي
كاراكوز : سيبوني ! نحّي يدك يا كازي ! سيبوني ! لا حول ولا قوة إلا بالله... سيبوني، راني إنسان موش حيوان، عندي حقوق... البلاد فيها قوانين ! ياخي تحسايبو الدنيا مسيبة ؟
دكتور حكيم : لصالحك يا سي كاراكوز. إنتي مريض ولازم نداويوك...
كاراكوز : تداويوني ؟ ما نيش مريض، لا باس عليّا، نطنطن أخزر... شكون قال لكم أنا مريض ؟
دكتور حكيم : إنتي مصاب بأزمة حادة متاع تقربيع ثنائي القطب وسواسي قهري.
باتمان (مريض آخر في سبيطار الرازي) : صحيح، كاراكوز مقربع، خيوطو مست بعضها. كاراكوز يا مهبول !
دكتور حكيم : خلّيه رايض يا باتمان... راهو تاعب في مخّو... برّ امشي أحكي مع أصحابك...
باتمان : باهي يا دكتور... أيّة مد الشكبّة يا دجوكير... تو نشكّب عليك بالحيّة... نعطيها لك لا تقرا لا تكتب...
كاراكوز : ما نيش مهبول ! راني بعقلي... أموري cinq cinq (خمسة على خمسة)...
دكتور حكيم : أوّل مرحلة في العلاج هي أنّو تقبل مرضك.
كاراكوز : تي صلي ع النبي يا سي محمد ! راني لا باس... ما عندي حتى مشكلة...
دكتور حكيم : ومرتك ؟
كاراكوز : آش بيها مرتي زادا ؟
دكتور حكيم : هي قالت لنا الي إنتي مريض.
كاراكوز : وآش تفهم منّو الطب، مرتي ؟ بالكشي تحسايبو عندها دكتوراه في الطب النفسي ؟ وإلا رئيسة قسم هوني في الرازي ؟
دكتور حكيم : مرتك تحبّك... مفجوعة عليك...
كاراكوز : آي تحبني برشة. النهار الكل شادة لي ساقي. "يا كاراكوز نحبّك... آش بيك عمرك ما تقل لي : نحبّك و نموت عليك زادا ؟". كي نقعد في الدار، تبدا شاريتها لي. "يا كاراكوز، لازمك تاقف معايا... أمسح الطاولة، انشر الحوايج، رد بالك ع الصغار !" وكيف نخرج نقهوج مع رجال الحومة، تقوم تخرنن : "ديما البرة ! ديما ناسيني... ياخي آنا آمبة في الدار وإلا مصلحة ؟ يا ريتني قعدت في دار بابا !"
دكتور حكيم : النساء لازمهم لهوة وشوية رومانسية.
كاراكوز : بالكشي تستخايل عرّست بركال، ممثلة متاع مسلسل مكسيكي ؟ آنا نعاودها لك : مرتي كذابة، تحب تتخلّص منّي. تحب هي زادا تشكّب عليّا.
دكتور حكيم : مرتك قالت لنا الي إنتي تنحّي حوايجك في الليل وتحط مرايات شمس وتتمد في السدّار. فسّر لي...
كاراكوز : قل لي، شكون أقوى عبد في الأرض ؟
دكتور حكيم : شفارزينيقر ؟
كاراكوز : لا هذاك ما عندو كان العضلات... نحكي على دونالد ترومب، رئيس الولايات المتحدة. شفت شعرو و جلدتو ؟
دكتور حكيم : ريتهم.
كاراكوز : نحب نولّي كيفو، bronzé وذهبي. وضوء القمرة باش يردني برتقالي.
دكتور حكيم : بدينا نقدمو... وكالمواقع الي تدخل لهم في الإنترنيت ؟
كاراكوز : حاجة ربّي، ماني كان راجل... بشهواتي...
دكتور حكيم : والتوراة اللي تقرا فيها ؟
كاراكوز : نحب نكتب كتاب على عيسى.
دكتور حكيم : عادا غالط في الكتاب. لازمك تقرا الأنجيل.
كاراكوز : ماهو باش نفهم الإطار.
دكتور حكيم : والسفرة الي باش تعملها لأنقليتيرا ؟
كاراكوز : باش نكتب كتاب آخر على حرب الزوز ورود.
دكتور حكيم : والمراة الي تحكي عليها في نومك ؟ داليندا... داليندا...
كاراكوز : جيناهاشي ؟ النساء أفاعي ما ترحمش. مخ الهدرة هو داليندا جارتنا الجديدة. ترنكوشة وتلبس محزوق. شلقت بيّا مرتي سعاد نكحّل عليها. من وقتها تطيّب لي الماكلة مسوس، تسربي لي القهوة محروقة والتاي يغلي. غسلت لي الدبش الأبيض مع الملوّن خرجوا الكل ورديين. حتّى كالحاجة... آش يقولوا لو... قالت لي ما عادش... أمسح مات...
دكتور حكيم : إنتي ترا في مرتك الأم الي جابتك وتلهات بيك، لكن مرتك ما هياش أمك. وفي اللاوعي متاعك، تتمنى لو كان جات مرتك داليندا وسعاد أمك. حسب خبرتي وعلمي، عندك مشكلة زوجية كبيرة تكمن في تصورك أنّو زوجتك ولات كيف الأخت.
كاراكوز : تو شكون المتكتك ؟ الطبيب وإلا الي مرّضتوه ؟ بر ّ داوي يا سيدي خويا.
باتمان : إنتي زادا عملها لك فازة الأخت ؟ تو تستانس. الداء صعيب والعلاج طويل. الصبر لله...
كاراكوز : يا حازواز إجري لي ! ربطوني في سبيطار المهبلة !
نص لكريم داي.
تعليقات
إرسال تعليق