دوشات التوالات
كاراكوز : صباح الخير يا للاّ سعاد...
سعاد : صباح الزفت، وإنت خلّيتني نرقد ؟ الليلة الكل وآنا نسمع في الشخير والنخير والبص : خخخ خخخ... تراتاتا ! خخخ خخخ... تراتاتا ! تقول عليها حرب الخليج في بيت النوم... والروايح، الأسلحة الكيمياويّة متاع صدّام حسين ! ما ناقص كان يكملوا يهدّوا علينا الأماريكان ! دبّابات أبرامز... ملاّ ليلة كلبة عدّيتها لي... راسي يوجع ونحس بدني الكلّو فاشل... الله لا ترحم من جابك...
كاراكوز : خلّي والديّا رايضين في قبوراتهم يا بنت الناس ! أمّي نبهت عليّا، قالت لي المراء هذه ما تهنّيش...
سعاد : ما نهنّيش ؟ تي شوف روحك : حلاويسة معشّينا بالخبّيزة... قدّاش لينا ما ذقناش لحم بقري والا علّوش ؟ ما نحكيوش ع البرڨدان والفراولو...
كاراكوز : هذاك حد جهدي... ماك تعرف، البلاد مكريزة، ميزيرية حرفة...
سعاد : وقل لي يا سي الشباب، من وقتاش أمّك مدفونة في الجبّانة ؟ موش هزّيتني ليها الجمعة اللي تعدّات وطردِتنا باش نجمت تفرجت على حريم السلطان، هيّ وفافاني ؟
كاراكوز : كانت ديما المرحومة تقل لي : يا ريتني ميتة عمري ما جبتك، خذيت لنا وحدة هابطة من الجبل، ما تسواش...
سعاد : عزّاك وخلاك ومندبة قدّامك ووراك ! الناس ترا عيوب العباد وما تشوفش عيوبها... الله لا تبارك لكم !
كاراكوز : الحاصيلو... نتصوّر البص والشخير جايين من الخدمة الجديدة في الأوزينة...
سعاد : كيفاش يا ولد الناس ؟
كاراكوز : برشة ضغط، برشة ستراس... مسؤوليات !
سعاد : مسؤوليات ؟ على شنوّة حطّوك مسؤول ؟
كاراكوز : آنا المسؤول على تركيب دوشات التوالات. خدمة صعيبة ولازمها برشة تركيز. كان نكبسو برشة، الرش يهرّي المخرج وكان ما نكبسوش كيف ما يلزم، الرش يبدا ضعيف وما ينظّفش الترامي.
سعاد : آكاهو، كلفوك بالترم !
كاراكوز : خدمة محترمة... آنا responsable qualité (مسؤول عن جودة).
سعاد : ال qualité متاع الترم !
كاراكوز : آنا أوّل حلقة في السياسة الصحّية متاع البلاد. آنا راجلك، الرئيس المدير العام كلفني بسعادة التوانسة ! بلاش الدوشات، يكون الشعب مسّخ وتتكاثر الأمراض : الكوليرا وجريان الجوف... وبلاش الرش الحنين، تبدا العباد على أعصابها ومردودية الخدمة تنقص والرجال تتغشّش على نساها... هذه بالرسمي خدمة للمنفعة العامة !
سعاد : ما تقعد كان مسؤول ع الترم...
كاراكوز : هيّا أسكت عليّا يا سعاد... ماك فاهمة منها شيء... قل لي، آش حضّرت لي لفطور الصباح ؟
سعاد : زيت وسكّر معاه شويّة بسيسة.
ياكل ويشرب شايخ عامل كيف.
كاراكوز : ما أبنها ! ما أحلاها العيشة كيف واحد رجع يخدم وسلّم في البطالة.
سعاد : ما أحلاها زادا كيف واحد يرش النقب.
كاراكوز : يزّيتشي يا مراء لا نوكلك المسبط ! راني نحبّك يا بدر البدور، آما ماك تعرفني، كيف تطلع لي الكلبة بنت الكلبة، العصا لمن عصى !
سعاد : تحسايبني باش نسكت لك يا ولد الناس ! حتّى آنا عندي السبركة ويد المهراز...
كاراكوز : برّ قيلني يا مراء ! إفهم قدرك...
سعاد : يا راجلي، يا ما أبنّك، يا رشّاش الترم !
كاراكوز : رشّاش ونصف ! رشّاش محترف ! عطاوْني جايزة أحسن خدّام في الجمعة هذه... خدمتي نحبها ونحب نتقنها، ما نخدمش كيف ما جات جات، نخدمها بڨلب ورب. صحّة الأمّة هي مسؤوليتي ! آشنوّة الفرق بين الطبيب وآنا ؟ ما ثمّاش فرق. هوّ يداوي المرضى وآنا ما نخلّيهمش يمرضوا. الوقاية خير من العلاج... مالا آنا خير من الطبيب !
سعاد : باهي يا كاراكوز ! يا باش مهندس رشّاش !
كاراكوز : ياخي ما ترشّش إنتي يا بنت الناس ؟
سعاد : ماك تعرفني، ديليكاتو شويّة، ما إنّظف كان بسرفيات ليلا. ما أحلاها السرفيات، رطبة كيف الحرير... نحس روحي أنيقة كيف الرومية.
كاراكوز : ناس تغسل وناس تلبّز...
سعاد : قدّاكش دوني يا راجلي !
كاراكوز : سوريّة وساقيها بالريش...
سعاد : آشبيني ؟ ما نيش مرتك، ما تحبنيش ؟
كاراكوز : لا، نحبّك... نحبّك كيف تطيّب لي مرمز، عقد وفندق الغلّة.
سعاد : ياخي ما تخمّم كان في كرشك ؟
كاراكوز : لا، نحبّك زادا كيف تغسل لي ساقيّا...
سعاد : الرجال والزمان، ما فيهمش أمان.
كاراكوز : عندي زوز قلوب : واحد في صدري والآخر في معدتي...
سعاد : باهي، ما عادش نطيّب لك ! ما تستاهلش...
كاراكوز : نمشي ناكل البرّة... كسكروت كفتاجي من عند اللص، لبلابي من عند الحطّاب... ملاوي من الملاّسين، صحن تونسي من باب سويقة... فريكاسي من نهج الدبّاغين، بريكة من باردو، شاورما من عند التركي... كسكروت عيّاري وحارة مروّب من عند ولد العيّاري... وأموري في العنبر...
سعاد : وقدّاش باش تشد بلا كسكسي وبلا مرقة لوبياء، بلاش دويدة وبلاش رشتة ؟
كاراكوز : آه صحيح... موش حل ! نحبّك يا سعاد، نحبّك ونموت عليك... نحبّك كيف تصنّف وتتفنّن...
سعاد : خسارة فيك... راجلي ما هو كان رشّاش...
كاراكوز : يا سعاد يا ممّو عينيّا، قل لي... آش تحبني نهدي لك باش نرضّيك وتطيّب لي كسكسي العرس، زبيب وعلّوش ؟
سعاد : "بوكي" نوّار...
كاراكوز : ياخي جات السان فالانتان ؟
سعاد : لا ما زالت... آما نحبّك تهدي لي نوّار... موش بلاستيك بو ضرّوح... نحب ورد وقرنفل و ڨلايول (glaïeul)...
كاراكوز : آشنوّة الڨلايول ؟
سعاد : دلبوث...
كاراكوز : دلبوث، يا لطيف ! تحبشي إكليل وزعتر ؟
سعاد : كان عينك تبات متعشّي، إهدي لي أزين نوّار في تونس ! أقل حاجة "بوكي" بتلاثين دينار...
كاراكوز : تلاثين دنّوس !
سعاد : مالا شنوّة يا راجل ؟ تحسايبني مراء بو دورو...
كاراكوز : تلاثين دنّوس، يا بو ڨلب !
سعاد : تلاثين ألف ع الأقل... والاّ زايد تروّح للدّار ! برّ كول ملاوي والاّ مطبڨة كان اشتهيت...
كاراكوز : اللعب حراش، ولّى بكروشنا...
سعاد : هذه قوّة النساء ! هذاك علاش نحنا ديما راكبين عليكمم !
كاراكوز : باهي... النوّار توْ ناخذهولك...
سعاد : ونحب دجاج مصلي تاخذهولي حاضر من الريستورون...
كاراكوز : ولّيتشي آنا نڨد الفطور ؟
سعاد : تحبني والاّ تكرهني ؟
كاراكوز : نحبّك يا عبلة، يا ليْلة...
سعاد : مالا نوّار ودجاج مصلي، ما نفهم شيء !
كاراكوز : آكاهوْ ؟
سعاد : لا، ونهار السبت تهزني لدار الجلد...
كاراكوز : تحب تزور القصبة ؟
سعاد : لا، نحب نتعشّى كيف الطنطخة...
كاراكوز : تحب تهردني ! توْ كيف رجعت نخدم وما زلت ما خلصتش وتحب سي ديجا تفَلّسني...
سعاد : نعرفك مخبّي تفتوفة !
كاراكوز : كيفاش تعرف ؟ شكون قال لك ؟ فركست لي في دبشي ؟
سعاد : نعرف آكاهوْ... آش يهمّك ؟ نهار السبت تهز تعشّيني كيف الأكابرية ! والاّ...
كاراكوز : والاّ ؟
سعاد : والاّ ما عادش نطيّب لك والباقي إنساه زادا، إمسح مات... فهمتني يا باش رشّاش ؟
كاراكوز : يا ستّار يا جبّار... الماكلة والباقي، ما نلعبوش بيهم...
نص لكريم داي.
مراجعة وتصحيح سيدي بقطاش.
تعليقات
إرسال تعليق