كاراكوز والكورونا

كاراكوز : الكوكو ! الكوكو ! الكورو ! الكورو ! الكوكورو !

حازواز : آشبي سيدي خويا مهنتل، شطرو عريان ويصيح كيف السردوك في الفجر ؟ تو عدّك بيهم يأذنوا الظهر... ماهو لا باس ؟

كاراكوز : الكوكو ! الكورو ! فيروس الكورونا... الوباء الصيني هبط علينا ! فيروس سوق ووهان جاء لسوق سيدي عبد السلام !

حازواز : فيروس made in China... فيروس بيدون... شويّة ثوم، شويّة بصل، نزيدو نهويّو ضبابطنا وتو يولّي الفيروس هو يحب يهرب من البلاد.

كاراكوز : ما تفدلكش... الوقت موش متاع تفدليك... ألاف العباد ماتوا... إيطاليا ولات جبّانة كبيرة... ميلانو مسكرة... إحححح.... إحححح... إحححح....

حازواز : آش بيك تكح يا كاراكوز ؟

كاراكوز : لا ما نيش نكح... إحححح.... إحححح...

حازواز : تي صلي على مولانا... نسمع فيك تكح...

كاراكوز : لا شيء... جرد برودة... 

حازواز : تطلعشي مريض بيه الكورونا....

كاراكوز : عفانا وعفاكم الله... سمالله الرحمان الرحيم... تحبني نقز؟

حازواز : لا أما ما نحبّكش تعديني.   

كاراكوز : لا باس عليّا يزّيتشي عاد. هاني نغسل يديّا كل ربع ساعة بالألكول... ناكل البصل والثوم... كيف نروّح للدار انّحي حوايجي ونقعد في كلسون ومرتي سعاد تغسلهم لي بالجفال. كرهبتي نعقّمها بالفليتوكس. نحوّس بماسك متاع غوص... إحححح... إحححح...

حازواز : مالا قل لي، شبيك نزعت حوايجك ؟

كاراكوز : قابلت الحاج كرمك الله. عينيه حمر ويكح على بعضو. شدني بالحديث وما حبّش يسيّبني... قلبي طاح... قلت يطلعشي مريض بالكوكو... بالكورو... بالكورونا... نحّيت التريكو على خاطر عطس عليه...

حازواز : لا هذاك يداوي في سبيطار أريانة، مريض بالسل...

كاراكوز : آه، السل ما يسالش... شيء نعرفوه... مرض أليف...

حازواز : عينك اليمين حمرة وخشمك يجري...

كاراكوز : ماني قلت لك لا باس !

حازواز : شريتشي ماكلة للدار ؟   

كاراكوز : من اللي خبروا ع الحجر الصحي، مشيت ل Géant وعبّيت زوز سيكان بالبيرة والشراب الأحمر. والكرهبة عبّيتها بال papiers toilettes، مرتي ديما تحب تتوضى كيف الفرنسيس. قالت شنوّة : أفين.   

حازواز : خذيتشي مقرونة ؟

كاراكوز : لا ما زال عندنا من عام 2011. عبّينا وقتها بيت الصالة بالمقرونة والكسكسي. ناكلو فيه لليوم وما حبّش يكمل.

حازواز : شريتشي ماسكوات متاع جراحة.   

كاراكوز : لا ما خلطّش عليهم. لبست ماسك متاع البحر وشريت نقاب، قلت لمرتي توب لربّي، إلبسو. الصغار ماهو قالوا ما يمرضوش، خلّيتهم بلاش... قالوا الصحّة ما تتشراش بالفلوس.   

حازواز : غصرة وتتعدّ. آما الحق، وجهك موش عاجبني حتى طرف.

كاراكوز : برودة ! ياخي ما تعرفش آشنية برودة يا كازي ؟ 

حازواز : المفروض تشد دارك وما عادش تخرج منها...

كاراكوز : هذاك آش بقى ! نقعد راسي راس المجيرة والذراري ! تحبني نهبل !

حازواز : عينيك تدمّع... 

كاراكوز : من السفر...

حازواز : آما سفر ؟

كاراكوز : ماهو رجعت من أوروبا ليّا نهارين...

حازواز : ومن فين يا سي الشباب...

كاراكوز : من ميلانو !

حازواز : يا سيدي محرز، إجري لي... الكوكو ! الكوكو ! الكورو ! الكوروكوكو !

نص لكريم داي.