البايرة
كاراكوز : هيّا فافاني، وقتاش نفرحو لك ؟ وقتاش ناكلو بريّج بقلاوة ؟
البايرة : يعطيك عزاء، ديما داك في كرشك ! تو نتكلفت مع اللي يجي على جال بقلاوة ؟ أعمل ريجيم يا ديني !
كاراكوز : تلعب بيه إنتي برج البقلاوة... شكون ما زال خالط عليه في زماننا ؟ راهو لوخي، كيف الكافيار... تي هاوْ الحليب والزبدة مقطوعين... قال لك ثمّة شكون طاحت لو الزبدة، ياخي خبّر عليها في فايسبوك وبدا يتباكى ويخرنن حتّى لين وحدة بنت الحلال حنّت عليه وجابت لو باكو زبدة بريما من البرور البعيدة.
البايرة : ياخي شكون قال لك اللي هيّ بنت الحلال بالمجد ؟ أيْ خردوقة تعدّات قدّام عينيك ما هياش بنت الأصل والفصل كيفي... النساء إسألني عليهم، الكلهم يقتلوا الحنش بهاكي القضية، كان فهمتني...
كاراكوز : وإنتي ناوياشي نهار تقتلو زادا الحنش ؟
البايرة : كيف يتعرّض لي، توْ ندبّر راسي... آشكون قال لك نقتلو برك ؟ أكيد نعمل فيه...
كاراكوز : آش تعمل لو بجاه ربّي ؟ تخنقو وتفتقو من بعضو؟ والاّ تسلخو، تسْبطو، تقصّو طروف طروف، وتنْشرو كيف القدّيد ؟ قدّيد حنش...
البايرة : يعطيك خازوق على حناكك، ما أقل حياك ! آنا صبيّة يا ولدي وإنت تغش فيَّ...
كاراكوز : ماني نعرفك... ما دام قلت صبيّة، باش تبدا تتشهّى...
البايرة : أيْ، شهوة صبيّة...
كاراكوز : قل لي، آش تحب المرّة هذه ؟
البايرة : تشيْشة زبدة...
كاراكوز : منين نجيبوها لك الزبدة يا بنتي ؟ هايْ مقطوعة من راس أنجلة لبرج الخضراء... تحبشي مرڨارين في عوضها ؟
البايرة : كيف يبدا عازب، تجيبوا لو الزبدة، شوف عازب والاّ لا... وآنا اللي نقل لك صبيّة، تخليوْني غصتي في قلبي... يا شومي !
كاراكوز : سملّه على قلبك ! أيّا خلّينا... هاوْ عندي خير من الزبدة.
البايرة : آش عندك خير منها، سمن ؟ من اللي قال لي الدكتور الصقلّي إبعد ع الكوليستيرول، وآنا اشتهيت الزبدة، عربي والاّ سوري... نبدا نحلم بيها تعوم فوق اللبن مشحمة ومزيْتة... ماذا بيّا جيت مرت حلايبي... في الحومة، نبدا نفركس ع الزبدة الحرّة والعطّار، الله يسامحو، يقل لي آنا ما نبيع كان المرڨارين : زيرو كوليستيرول... محموصة ع الزبدة...
كاراكوز : أيّا إسمعني، كيفاش تحبها إنتي ؟
البايرة : آنا نحبها وباستا ! وما نحب شيء غيرها رغم اللي ما عادش منها برشة في تونس... وما ننشرّطش... زبدة عادية...
كاراكوز : والرويجل، كيفاش تحبّو ؟
البايرة : راجل عادي زادا... موش بالضرورة حلايبي...
كاراكوز : هاوْ توهامي مرْتو توْ كيف توفّات... هجّال جديد...
البايرة : اووووه، توهامي ! دڨة على عينك ! نصوم نصوم ونفطر على جرانة...
كاراكوز : أيّا يزّينا يا فافاني، زعمة حتّى مرّة ما فطرت ؟ يقعد سر بيناتنا... تعرفني...
البايرة : يظهر لي باش نفطر اليوم عليك إنت يا حرايمي ! توْ تشوف فافاني كافيّة والاّ لا !
كاراكوز : لا عاد ! مرتي سعاد ما تحبّش تقسم، حزّارة وربّي يهديها...
البايرة : نعرفو الخنّار هذا... قدّاش تڨدّو سعاد، سبعة ألطاف، يجيوْنا خفاف نظاف...
كاراكوز : سبعة شنوّة ؟ نظاف والاّ مسخين ما يسالش...
البايرة : ماهو خاطر مخّك خامج وما تصفاش.
كاراكوز : توهامي ما زال صغير، 55 عام وإنتي...
البايرة : وآنا شنوّة ؟ سنّيا طايْحة بالكشي ؟
كاراكوز : إنتي كبيرة : آش وستّين سنة وربّي يبعّد عليك العين...
البايرة : لحاك ! آنا ما ناخو كان واحد عمرو أقل من ال 30. ما نيش تشيشة والاّ طريف... نحب بوڨوس، طبيب والا مهندس، يعشّيني في دار الجلد والاّ في ڨمرت... نسافرو ل نمسا وبراڨ في الربيع ول ميكونوس في الصيف... تبدا عندو مرسيديس والاّ بي ــ آم... راجل عادي يبني لي قصر في النصر... نجيبو زوز أولاد، موش أكثر... والاّ ما ثمّاش بالكل !
كاراكوز : ماهو يا فافاني، أعطيني وذنك نعطيك...
البايرة : أعطيني وخوذ وذنيّا الزوز...
كاراكوز : ما نعطيكشي، ماني قلت لك سعاد...
البايرة : برّا لا تسلك لها وحْلة سعاد !
كاراكوز : واللهي توهامي يظهر صغير... ترنكوش...
البايرة : بربّي، يزّيني ماني مشيت ل السويد ولقيت حاجة تملأ العين !
كاراكوز : تملأ العين أكّاهوْ ؟
البايرة : ما يهمّكش... أندارس نيلسون كان سيد الرجال، علج ممسكل وشعرو قمحي ذهبي... حب يخطبني... قلت لو طهّر ياخي ما قبلش وآنا سلّمت فيه ويا ريتني ما سلّمت... عجبك الحال توْ ؟ رجال تونس كرشهم قدامهم، مشعارين... يكركروا في ساقيهم لابسين شلاكة بوصبع ودجوڨينڨ... يعيشوا ويسهروا في القهوة. هايْ شيشة، هاوْ طريّح رامي... ما عندهمش ڨرام رومانسية... أندارس كان يهدي لي كل نهار نوّار وديما يقل لي نحبّك... كنت شمسو وهلالو... الله غالب، ما كتبش... توْ ولّيت آنا نجري لا يفوتني الترينو... تحبشي تجي تاكل بيسكوت في الدار ؟ بالمارڨارين والعسل... وشويّة تفّاح وإنزاص ؟
كاراكوز : ما حاجتيش، قال لك مخزن مسكر ولا كرية مشومة...
البايرة : زعمة المخزن ديما مسكّر ؟
كاراكوز : ما يهمّكش فيه ! المخزن مخزني ونحلّو للّي نحب...
البايرة : سهّلها تسهال ! كلبي راكس يهنّيني في الدار... آش يندب بيهم ؟ هزّيتو ل الطبيب نحّاهم لو... ما نراوْ عندك يا كاراكوز...
كاراكوز : آش ما زال واحد يسْوى بلاش بيهم ؟ هيّا، قل لي قوم، اللعب بعشانا توْ...
البايرة : شوف كيفاش إبن آدم خايف يطرطر !
كاراكوز : اللي خاف نجا...
البايرة : برّ، إن شاء اللهً فين تقبل تزبّل !
كاراكوز : أيّا، أنّستك براكس سيد الكلاب ! وسلم لنا على بوك أندارس...
نص لسيدي بقطاش.
مراجعة وتصحيح كريم داي.
تعليقات
إرسال تعليق