قصيدة الستار 1 (والخاتمة)

ضحكة والاّ دمعة ۞ الظل وراه شمعة.

حقيقة وخيال ۞ وڨلبي ليه ميّال !

الشاشة تكشف ع الرجال ۞ ع الشويطن والدجّال...

الله راهو قهّار ۞ والدهر ديما غدّار !

الأيّام في تونس تجري ۞ بالميلادي والاّ بالهجري.

إيجى يا خنّاب الأعمار ۞ وبين الحلو والمر اختار.

المخايلي خالق سحّار ۞ فداوي يلعب بالنار...

أسرارك عندهم مكفنين ۞ وشيء ما هم ناسين !

يا ستّار ! يا جبّار ! ۞ ما تورّيهم باب الدار !

كاراكوز يعيش ويموت ۞ لا زبنطوط لا بلعوط !

حازواز ديما بهبار ۞ وصاحبو أكبر كركار.

قدّامهم، كان تستر روحك ۞ المخايلي ملقوط يتضوحك.

قدرك راوْ يطيّحهو لك ۞ إزرب ! غطّي الحمصة وفولك !

حط الجبّة والطربوش ۞ مد دنّوس وطاح السطوش...

سيدي تاتا، يا طرطور ۞ إفصع، خوذ أقرب بابور !

عند الرواسة هدّوا عليك ۞ كاراكوز وخوه ظهروا صعاليك،

باعوا أسرارك روبا فيكيا ۞ طير طيران لأمريكيا !

الخاتمة

كعبة دڨلة وكعبة لوز ۞ كاراكوز والاّ مهروز ؟

عيش حياتك كي المكلوب ۞ بالبخت والاّ السعد المكبوب.

عاشر الطنطخة والمقهور ۞ وكون معاهم باش سنڨور...

راهي الدنيا جيــب منقـــوب ۞ وأيّـــامــك فيســع مــــا تــــذوب.

ما تضيّعش وقتك مع بوبطان ۞ تبهنس وبوس يد السلطان !

معرفـتك في النـــــاس كنـــوز ۞ تبّع كـلامي تربــح وتفـــــوز!  

نص لكريم داي.