البوعزيزي
بابا روحي : عالثلامة كراكوث ! آث بيك لا باث ؟ وثهك مبوّم كيف البوكثّاث...
كراكوز : بوكشّاش ؟ وجهي ؟ ما ريتش روحك يا قزم، يا الأعوج ! ناس بكري يقولوا : الجمل ما يراش حدبتو...
بابا روحي : والكركدن ما يراث ترمتو...
كراكوز : توْ نورّيك النجوم في القايلة يا ڨعر ! يا بوجادي !
كراكوز يضرب بابا روحي.
بابا روحي : أي ثحيح، آنا مثوّر عليك... آما راهو في القايلة، ما فمّاثي نثوم...
كراكوز : سكتشي يا قريّد ! قيلني، أخطاني...
بابا روحي : لا، بالمثد... آث بيك مكثبر موث عاثبك الحال ؟
كراكوز : خلّيني...
بابا روحي : آث بيك بالع ثبركة والاّ ثوث ؟
كراكوز : توْ نورّيك وين باش نحطها لك السبركة !
بابا روحي : الله يلطف بينا من الثبركات والباڨات والبق والبرغوث...
كراكوز : يا ريت البرغوث معشّش في بدنك والقمل يغلي في شعرك.
بابا روحي : لا، القمل لا ! باش يڨرعوا لي بالطاثة...
كراكوز : يا مكراب، ما أقل حياك !
بابا روحي : لا، أمان ! ثعري بدا ياكل فيّا... خثيتني بالعين !
كراكوز : أيْ، بالعين الحرشة... باش نزيد نطلّع لك كربتك يا بابا روحي !
بابا روحي : لا، موث كربتي... إختار حاثة أخرى...
كراكوز : خشمك... باش نطلّع لك خشمك !
بابا روحي : ولّيت بينوكيو ! لعبة خثبية، موْهِبة ربّانية...
كراكوز : يا ڨمبور، يا بهلول...
بابا روحي : أمّي قالت لي : أكبر بهلول هو التبهليل...
كراكوز : أمّك قزمة كيفك ؟
بابا روحي : لا، طويلة قد منڨالة ثاحة 14 ثانفي...
كراكوز : آه، ما تذكرنيش !
بابا روحي : فاث ؟
كراكوز : في البوعزيزي...
بابا روحي : في البوعثيثي ؟ آث عمل لك البوعثيثي ؟
كراكوز : هوّ شيء، الله يرحمو... آما الأسطول اللي جانا م البرّه ! الله لا يذوقك ما ذقت ولا يورّيك ما شفت !
بابا روحي : آث ريت يا كراكوث ؟
كراكوز : ماك ريتهم إنت زادا ! العجايب... والمصايب...
بابا روحي : ما ريت ثيء ! تحب تباثيني معاك ؟
كراكوز : يا خوّاف، يا طرطار !
بابا روحي : خوّاف ونث... خوّاف أكثر م الخوف...
كراكوز : يا جبان !
بابا روحي : لا، ما نيث ثلبانة...
كراكوز : تسمع بيه ولد ال15 ؟
بابا روحي : فاث يبيع هذا، في اللفت ؟
كراكوز : يراك تولّي طرشي لفت يا قزمون !
بابا روحي : وإنتي ثيتونة ثايحة وليمون...
كراكوز يفشّخ بابا روحي بطريحة.
كراكوز : يا عود قرنفل ! يا ڨناويّة ! يا زيوانة ! يا زغران ! كول على ظهرك !
بابا روحي : آيْ ! آيْ ! كربتي لا ! آيْ، يا مثودر !
كراكوز : يا بعبوص كبّار ! يا ستيلو بيك ! قل لي : عجبتّك أمال مثلوثي ؟
بابا روحي : أيْ، حلوّة ومثيانة، تثرّه... طيحت على ثنية مبارك... تاخثها لي ؟
كراكوز : هذيكة للّة النساء، ما تاخذش وشواشة كيفك...
بابا روحي : نموت على ثوتها... آنا حرّة وكلمتي حرّة، آنا حرّة وكلمتي حرّة، ما تنثاث حق الكمية !
كراكوز : لوز وفزدق وكاكوية...
بابا روحي : وحمث وقلوب وثامية...
كراكوز : آه، البوعزيزي وما أدراك ما البوعزيزي !
بابا روحي : في بالك أختو هثّت لمونريال ؟
كراكوز : قالوا بأوراقها. لاجئة سياسية...
بابا روحي : ثعمة ترثى بيّا ؟ نخطبها، نولي أمير في الكندا...
كراكوز : تي قنفودة بشلاغمها ما ترضاش بيك... يا بو كربة، يا مسكين !
بابا روحي : ما نحبّث نقعد ثبنطوط... لاثم نلم ثاقيّا...
كراكوز : بديتشي تكوّن ؟
بابا روحي : هاني نبيع في اللوبياء المنفخة. هذا آث نكثب...
كراكوز : أمورك ما هياش هيّ.
بابا روحي : علاث ؟
كراكوز : لازمك تبيع حاجة أخرى.
بابا روحي : إن درى، كان نثيد نبيع الهروث والنواثر والحلالم، نولّي انّثّم ناخث أخت البوعزيزي ؟
كراكوز : صعيب يا بابا روحي...
بابا روحي : علاث ثعيب ؟ نحب نورّق، نحب نحرق، نحب نثلّك أموري، نحب نطلع للڨمرة ونولّي طنطخة !
كراكوز : برّ بيع لوبيتك المنفخة...
بابا روحي : إنت قثيت لي على أحلامي.
كراكوز : تعرف ناس بكري آش يقولوا ؟
بابا روحي : الثنقة مع الثماعة خلاعة ؟
كراكوز : لا، يقول : داخل لسوق البصّاصين بلاش ترمة !
بابا روحي : عندي ترمة كبيرة ومثحمة كيف ليّة العلّوث...
كراكوز : يا حسرة على ليّة العلّوش كيف آش كانت ! حتّى علالشنا ولّينا نستوْردو فيهم وبعبوصهم رهيّف كيف المرڨازة.
بابا روحي : والقدّيد كيف آث نعملوه ؟
كراكوز : نستوْردوه هوّ زادا !
بابا روحي : من فين ؟
كراكوز : من إسبانيا ورومانيا.
بابا روحي : يكب ثعدهم ! يطلع موث حلال...
كراكوز : لا، قدّيد مطبوع... بسملوا عليه...
بابا روحي : كان بثملوا عليه، ما يثالث...
كراكوز : قسم على الله وبرّه !
بابا روحي : وين كنّا، وين ثبحنا...
كراكوز : آما أكباشنا من اللي كانوا يصيحوا الكل : زعبع ! زعبع ! راضوا وولاّوْا محترمين : بع بع... بع بع... بع بع...
بابا روحي : نحّاوْا التبندير...
كراكوز : هذه هيّ حرية التعبير : بع بع... بع بع...
بابا روحي : بع بع... بع بع...
كراكوز : يحيا بن... يحيا سيدي بوزيد ويحيا بسبوسة !
بابا روحي : بع بع، تحيا ثورة البرويطة !
كراكوز : شغل، حرية، كرامة وطنية !
بابا روحي : تونث حرة حرة والتنوفيق على برّه !
نص لكريم داي.
مراجعة وتصحيح سيدي بقطاش.
تعليقات
إرسال تعليق