غسلة كاراكوز
حازواز : أيّا فينك ؟ عندنا ساعة نستناوْ فيك ! كان في بالنا هكّة، رانا عيّطنا للبغل شلغوم يلعب رابع...
كراكوز : آآآآه ! والله... آآه !
حازواز : آش بيك ؟ آش ثمّة ؟
كراكوز : واللهي حاشم بش نقل لك...
حازواز : لا شنوّة عادا ! ياسر حشّام... آش بيك قريب باش تبكي ؟
كراكوز : طريق الشهر...
حازواز : شنوّة طريق الشهر ؟
كراكوز : كيفاش نقل لك ؟ جاتني الغسلة يا وخيْ...
حازواز : لحاك، ياخي من وقتاش الرجال تجيهم الغسلة ؟
كراكوز : ماهو الكبول بابا روحي، مرّة هرّستو بطريحة نباش القبور ! مشى للمرّوكي سحّار بومهل، قال لو أعملي البخوخو... من حينها، كل شهر نانا فيانة، نانا كيفي آنا...
حازواز : أيْ كيفاش عامل مع المجيرة ؟
كراكوز : مرّة هيّ عندها طريق الشهر، مرّة آنا تجيني الغسلة. وزيد عندي حاشاك وحاشى قدرك العذر... فبحيث...
حازواز : أيْ وكيف تورث، كيف الراجل والاّ كيف المراء ؟ أيّا يزّينا من المشاكل، للبيسين...
كراكوز : أها ! ما نحبّش...
حازواز : برّ نمشيوْ !
كراكوز : أها ! ما نحبّش...
حازواز : آش بيك تتمعجن يا خرنانة، ولّيتشي نقرّق بيك ؟
كراكوز : ماني قلت لك، عندي طريق الشهر وزيد ما انّجّمش نلبس قلصون البحر...
حازواز : ما تلبس شيء، إيجى زنط زڨط ! موش الممثل السوري اللي عرّى في أيّام قرطاج خير منك...
كراكوز : ماني ما نقّيتش ساقيّا...
.......
كراكوز : هكّة توْ خلّيتني ضحكة... يعطيها نيلة الدنيا !
حازواز : سملّه على خويا... ما تحط شيء في بالك ! كان تشوف قدّاشني هاكة حدّي عليك، تجي فيّا والاّ فيك، نفديك برجوليتي... لا، بعينيّا خير... كراكوز خويا راجل ! كراكوز باندي ما يڨدّو حد... كيف يوفى طريق الشهر وتنقّي، تجي معايا للبيسين ؟
كراكوز : ألف في المياة... تعرفني، نحب التبحبيح والألعاب هاكي...
حازواز : مالا كيف تجي، إلبس السترينڨ القزوردي متاع مرتك، عندي قرون وآنا نحب نكحّل عليها... لا عليك...
كراكوز : والله لا جيت شيء ! أخّيت... أعـعـق...
.......
حازواز : ايّا فينك ؟ عندي قدّاش ما شفتش ها الوجيّه السمح...
كراكوز : موش صحيح ! عندنا جمعة مشينا للبيسين مع بعضنا...
حازواز : جلدتك تبڨص ! بيضة تللش...
كراكوز : أيْ صحيح... ماني خوك، هاني باش نقل لك على حاجة وما تقول لحد...
حازواز : ماك تعرفني، سرّك في بير... كان تحب ما تحكيش... برّ أحكي لشلغوم خير، هذاك باز ما يعاود لحد : قول ما فمّاش حد ينسى ما يقل لوش...
كراكوز : خويا حزواز، فمّة مديدة طريق الشهر ما جانيش.
حازواز : أيْ ها النهار السعيد... باش ترجع لنا راجل ! ماني قلت لك شدّة و تزول...
كراكوز : خايف نطلعشي أحبل.
حازواز : ومن شكون بش تحبل ؟
كراكوز : بربّي تقعد بيناتنا...
حازواز : توْ هذا كلام يا فحل ؟
كراكوز : تتذكر شهر التالي، كلّمتني، قلت لك عندي قضية... وقتها نسكر مع باكير... عهدي بروحي نسكر، قمت في الصباح نلقى روحي زبنطوط ووحدي...
حازواز : قلبكشي الكازي في فلوس ؟ نعرفو يدّو خفيفة...
كراكوز : هاوْ موش كان يدّو طلعت خفيفة !
حازواز : مالا قل لي، باش تجيب لنا باكير صغرون ؟
كراكوز : بربّي، ما تكمّلش على ما بيّا...
حازواز : ما تقل ليش باش تنحّيه ؟ وقتها، لازم تشاور باكير... ساهم هوّ فيه وعندو حق باش يعترض...
كراكوز : لا هكّاكة متبري منّو هوّ ! قال لي : كان تجيبو، انت تصرف عليه.
حازواز : هاك ديجا حاكي معاه باكير ! مالا آنا، آخر واحد يعلم... باز شلغوم في بالو !
كراكوز : هكّة والاّ هكّة، باكير جيفة...
حازواز : إحمد ربّي ما قال لكش انفقني... ماهو توْ، كيف الراجل كيف المراء...
كراكوز : توْ، رجّعتني مراء ؟...
حازواز : سامحني... قل لي، آش باش تعمل ؟
كراكوز : الاجهاض حرام !
حازواز : هاوْ سيدي الشيخ يحكي عالحلال وعالحرام… تي انت الحرام يمشي على ساقيه... الشيطان يخاف على روحو منّك !
كراكوز : تقطعت لو خبزتو الشيطان.
حازواز : كيفاش باش ترضْعو الملقوط اللي باش تجيبو ؟ نتخيْلو واحد بوطحش حتّى من سنّيه مظيهم...
كراكوز : آنا ما عنديش بزازل... صدري مشعار... توْ مرتي ترضْعو...
حازواز : توْ تفرح بيك برشة المجيرة... هيّ من غير سبب وفارحه بيك، خلّي تسمع الخنار ! آنا ننصحك : برّ أرجع لباكير شوف معاه حل !
نص لسيدي بقطاش.
مراجعة وتصحيح كريم داي.
تعليقات
إرسال تعليق