كاراكوزوفيتش

كراكوز : آيْ، آيْ، ظهري تقوّس... ملاّ كرفي الخدمة في الأوتيل...

حازواز : شبيك يا سود العين ؟ 

كراكوز : نهار كامل وآنا نكسّل في العزايز الرواسة، عدّيت عمري طيّاب ڨورّة، يعطيهم خازوق علي حناكهم... هايْ القشرة الميتة، لمّيت منها شكاير !

حازواز : يعطيك سخطة...

كراكوز : يعطيك إنتي مرقد ما تقومش منّو...

حازواز : يعطيك بقلة تهزّك... قل لي، ورّقتشي ع الأقل مع وحدة Maruschka ؟

كراكوز : لا، هاذومة سلعة مضروبة، second choix 

حازواز : second choix، يا شومي...

كراكوز : تحبني نتّدفن زوّالي، حالتي تاعبة وصڨعان في سيبيريا ؟

حازواز : دز ع الفودكا يا بلهاء !

كراكوز : كسروا لي كرايمي الرواسة... حتّى من شطحطهم معفطة...

 حازواز يقوم يشطح كيف الرواسة ويغني.

حازواز : كالينكة، كالينكة، كالينكة مويا !

كراكوز : يا الله، سميرنوف، موسكو، فودكا، بوتين، بيريسترويكا...

حازواز : كالينكة، كالينكة، كالينكة مويا !

كراكوز : يا الله، ستروڨونوف، لينينغراد، فلاديفوستوك، يوري ڨاڨارين...

حازواز : كالينكة، كالينكة، كالينكة مويا !

كراكوز : يا الله، يوري دجوركاييف...

حازواز : لا، هذا أمّو أرمينية.  

كراكوز : را را راسبوتين، lover of the Russian queen... فيفا زاباتا !

حازواز : يا سطاكة، هاك بديت تخرم...

كراكوز : علاش ياخي زاباتا موش روسي ؟

حازواز : لا، مكسيكي... قل لي، آش عملت بيها قشرة الرواسة ؟ خرّجت منها حليب الغولة ؟

كراكوز : ندبّر في راسي ماك تعرف... تفاهمت مع فيرمة، نبيع لهم القشرة يوَكلوا بيها الدجاج ويعطيوني العظم نزقق بيه الذراري اللي في الدار والباقي نرم فيه وحدي... كان سألني حد، آهوْكة نقول عظم عربي...

حازواز : موش عظم روسي زعمة ؟

كراكوز : شطر بشطر... أما الفروخ، ولاّوْا كيف يفيقوا من النوم، يقولوا لي "بريفيات" !

حازواز : والمجيرة ذاقتهم زادا ؟

كراكوز : يا بيْ، كل نهار... صدرها تنفخ و شعرها صفار...

حازواز : يا ولد الكلبة، يا مزهار !

كراكوز : وفي طمبك الليل، تقل لي : آآآآه، يا بوريس !... ياخي سألتها : يا بنت الناس، شكونو بوريس هذا ؟ ياخي جاوبتني : انتي هوَّ راجلي بوريس ونموت عليك... 

حازواز : يا ولد الحرام !

كراكوز : وفي النهار، ما عادتش تحب تطيّب لي كسكسي، تطيّب كان شربة الشتشي...

حازواز : التشيش ؟

كراكوز : لا، شربة الشتشي بالكرمب، ماكلة روسية...

حازواز : هاك خذيت علجية يا ملقوط !

كراكوز : لا علجية لا والو، هاذي إسمها محرزية عمايل !

حازواز : آش عملت لك ؟ أحكي لي...

كراكوز : كيف نحب نتفرّج ع الكرة، تبدّل القناة وتحط مسلسلات.

حازواز : كيف النساء الكل... جاك الشيء غريب ؟

كراكوز : لا، هاذي كثرتّلها ! تحط قناة روسيا وان وتتفرّج لي على مسلسلات بالروسية. تغرمت لي بدانييل ستراخوف. تغشّشت وقلت لها باش نطردك من الدار، تمشي لدار بوك...

حازواز : أحسن ما عملت ! طلعت راجل في الأخر...

كراكوز : لكن قالت لي : ها توْ ندزهولك مع بوتين.

حازواز : الله لا تربّحها ! ركبت عليك وتمدّت على طولها...

كراكوز : ما تذكّرنيش في همّي...

حازواز : وإنتي صنديد وسيد الرجال، مستحيل تكون سكتّلها...

كراكوز : مستحيل... النساء، هموم زرقاء...

حازواز : قل لي : وآش عملت لها م الأخّر ؟ فشّختها ؟ شلبقتها ؟ فريكتها ؟ شنڨلتها من ساقيها ؟

كراكوز : لا، خلّيتها في الدار تتفرّج على روسيا وان ورجعت نجري للأوتيل نكسّل في ديميتري وفلاديمير...

حازواز : ههههه...

نص لكريم داي.
مراجعة وتصحيح سيدي بقطاش.